ലോക കോടീശ്വരന്മാർ; ആദ്യ പത്തിൽ നിന്ന്​ അംബാനി ഔട്ട്



മുംബൈ :കോവിഡ്​ ലോക്​ഡൗണൊന്നും ഒരു തരത്തിലും ബാധിക്കാതെ ഇൗ വർഷം വെച്ചടി വെച്ചടി കയറ്റം മാത്രം കയറിയ വ്യവസായിയായിരുന്നു റിലയൻസ്​ ഇൻഡസ്​ട്രീസി​ന്റെ  മുകേഷ്​ അംബാനി. ബ്ലൂംബർഗ്​ മുമ്പ്​ പുറത്തുവിട്ട ലോകത്തിലെ അതിസമ്പന്നരുടെ പട്ടകയിൽ നാലാം സ്ഥാനം വരെ കൈയ്യടിക്കിയിരുന്നു അദ്ദേഹം. എന്നാൽ വർഷാവസാനം കാര്യങ്ങളെല്ലാം കൈവിട്ടുപോകുന്ന അവസ്ഥയിലാണ്​. പുതുവർഷം വരാൻ ദിവസങ്ങൾ മാത്രം ബാക്കിനിൽക്കെ ബ്ലൂംബര്‍ഗ് പുറത്തുവിട്ട പുതിയ അതിസമ്പന്നരുടെ പട്ടികയില്‍ മുകേഷ് അംബാനിക്ക്​ ആദ്യ പത്തിൽ പോലും ഇടമില്ല.

ബ്ലൂംബർഗി​െൻറ സൂചിക പ്രകാരം 76.5 ബില്യണ്‍ ഡോളറാണ് (5.63 ലക്ഷം കോടി രൂപ) അംബാനിയുടെ നിലവിലെ ആസ്തി. മാസങ്ങൾക്ക്​ മുമ്പ്​ വരെ അത്​​ 90 ബില്യണ്‍ ഡോളറായിരുന്നു (6.62 ലക്ഷം കോടി രൂപ). ഇതോടെ പട്ടികയില്‍ 11 - ആം സ്ഥാനത്തേക്ക് താഴ്​ന്നിരിക്കുകയാണ്​ അംബാനി. ഒറാക്കിള്‍ കോര്‍പ്പറേഷ​െൻറ സഹ-സ്ഥാപകന്‍ ലാറി എലിസണ്‍, ഗൂഗിളി​െൻറ സഹസ്ഥാപകന്‍ സെര്‍ജി ബ്രിന്‍ എന്നിവര്‍ക്ക് പിന്നിലായാണ്​ മുകേഷ് അബാനിയുടെ സ്ഥാനം.

അടുത്തകാലത്ത് റിലയന്‍സ് ഓഹരികളില്‍ സംഭവിച്ച വീഴ്ച്ചയാണ് ഇന്ത്യൻ വ്യവസായിക്ക്​ തിരിച്ചടിയായത്​. ഓഹരിയൊന്നിന് 2369.35 രൂപ എന്ന എക്കാലത്തേയും ഉയര്‍ന്ന നിലയില്‍ നിന്നും 16 ശതമാനം നഷ്ടത്തിലേക്കാണ്​ റിലയന്‍സി​െൻറ ഓഹരികള്‍ കൂപ്പുകുത്തിയത്​. വ്യാഴാഴ്ച്ച വ്യാപാരം അവസാനിച്ചപ്പോള്‍ 1992.95 രൂപയാണ് റിലയന്‍സി​െൻറ ഓഹരിയുടെ വില.

മൊത്തം 186 ബില്യൺ ഡോളർ ആസ്തിയുള്ള ജെഫ് ബെസോസാണ്​ ലിസ്റ്റിൽ ഒന്നാമത്​​. 160 ബില്യൺ ഡോളറുമായി ഇലോൺ മസ്‌ക്, 131 ബില്യൺ ഡോളറുള്ള ബിൽ ഗേറ്റ്സ്, 110 ബില്യൺ ഡോളറുള്ള ബെർണാഡ് അർനോൾട്ട്, 101 ബില്യൺ ഡോളർ ആസ്തിയുള്ള മാർക്ക് സുകർബർഗുമാണ്​ പട്ടികയിൽ രണ്ട്​ മുതൽ അഞ്ചാം സ്ഥാനം വരെയുള്ളത്​.




keyword:mukesh,ambani