മുഗു സഹകരണ ബാങ്ക് തട്ടിപ്പ്: 14 പേര്‍ക്കെതിരെ വിജിലന്‍സ് കേസെടുത്തു


കാസര്‍കോട്: ഒക്ടോബര്‍ 05.2018. പുത്തിഗെ മുഗു സര്‍വ്വീസ് സഹകരണ ബാങ്കില്‍ നടന്ന തട്ടിപ്പുമായി ബന്ധപ്പെട്ട് ഭരണസമിതി അംഗങ്ങള്‍ ഉള്‍പ്പെടെ 14 പേര്‍ക്കെതിരെ വിജിലന്‍സ് കേസെടുത്തു. ബാങ്ക് ഭരണസമിതി അംഗങ്ങള്‍, മുന്‍ സെക്രട്ടറി, സെക്രട്ടറി, ബാങ്ക് മാനേജര്‍ എന്നിവര്‍ ഉള്‍പ്പെടെ 14 പേര്‍ക്കെതിരെയാണ് അഴിമതി നിരോധന വകുപ്പ് പ്രകാരം കേസെടുത്തത്. 

ബാങ്കില്‍ തട്ടിപ്പ് നടന്നിട്ടുണ്ടെന്നും ഇതന്വേഷിക്കണമെന്നും ആവശ്യപ്പെട്ട് ഇ.കെ മുഹമ്മദ്കുഞ്ഞി വിജിലന്‍സ് കോടതിയില്‍ നല്‍കിയ ഹര്‍ജിയിലാണ് കേസെടുക്കാന്‍ കോടതി നിര്‍ദ്ദേശമുണ്ടായത്. അന്വേഷണത്തിന്റെ ഭാഗമായി വിജിലന്‍സ് അധികൃതര്‍ ബാങ്കിലെത്തി പ്രാഥമിക അന്വേഷണം നടത്തുകയും ചെയ്തിരുന്നു.

ബാങ്ക് ജീവനക്കാരനായിരുന്ന ഒരാളും ബന്ധുക്കളും മറ്റുള്ളവരും ചേര്‍ന്ന് 2.75 കോടിയുടെയും മറ്റൊരു ജീവനക്കാരനും ബന്ധുക്കളും ചേര്‍ന്ന് 1.61 കോടിയുടെയും വായ്പകള്‍ തരപ്പെടുത്തിയെന്ന് വിജിലന്‍സില്‍ നല്‍കിയ പരാതിയിൽ പറയുന്നു.

കൂടാതെ ബാങ്കിന്റെ ഭരണസമിതി അറിയാതെ അവരുടെ പേരില്‍ ലക്ഷക്കണക്കിനു രൂപയുടെ വായ്പയെടുത്ത് തിരിമറി നടത്തുകയും 10 ലക്ഷം വായ്പയെടുത്തയാള്‍ക്ക് എട്ടു ലക്ഷം രൂപ മാത്രം നല്‍കിയതടക്കമുള്ള പരാതികള്‍ ലഭിച്ചിട്ടുണ്ടെന്നും വിജിലന്‍സ് അറിയിച്ചു.

അന്വേഷണത്തിന്റെ ഭാഗമായി ഇതുവരെയായി ബാങ്കില്‍ നിന്നു വായ്പയെടുത്തവരുടെയും ഭരണസമിതി അംഗങ്ങള്‍, ജീവനക്കാര്‍ എന്നിവരുടെയും മൊഴിയെടുക്കുകയും രേഖകള്‍ പരിശോധിക്കുകയും ചെയ്യുമെന്നും വിജിലന്‍സ് ഉദ്യോഗസ്ഥര്‍ വ്യക്തമാക്കി.

kasaragod, kerala, news, Mugu bank cheating; case against 14.