തിരക്കഥ ആരുടേതാണെന്നത് എന്റെ വിഷയമല്ല; മഹാഭാരതം സിനിമയാകും-ഡോ.ബി.ആര്‍ ഷെട്ടി

 
അബുദാബി: ഒക്ടോബര്‍ 11.2018. മഹാഭാരതം സിനിമക്ക് വേണ്ടിയുള്ള തിരക്കഥ സാഹിത്യകാരനായ എം.ടി വാസുദേവന്‍ നായര്‍ തിരികെ വാങ്ങുന്നതിനെ കുറിച്ച് ഒന്നും അറിയില്ലെന്ന് ചിത്രം നിര്‍മ്മിക്കുമെന്ന് പ്രഖ്യാപിച്ച പ്രവാസി വ്യവസായിയും യു.എ.ഇ ആസ്ഥാനമായ എന്‍.എം.സി ഗ്രൂപ്പിന്റെ ചെയര്‍മാനുമായ ഡോ.ബി.ആര്‍ ഷെട്ടി. തിരക്കഥ ആരുടേതാണെന്നത് എന്റെ വിഷയമല്ല. മഹാഭാരതം പോലുള്ള വലിയൊരു കഥ ലോകത്തിന് മുന്നില്‍ അവതരിപ്പിക്കുക എന്നതാണ് എന്റെ ലക്ഷ്യം. ഒരു യഥാര്‍ത്ഥ ഇന്ത്യക്കാരന്‍ എന്ന നിലയില്‍ അത് എന്റെ കടമയാണെന്ന് കരുതുന്നുവെന്നും അദ്ദേഹം പറഞ്ഞു. 

ആയിരം കോടിയിലേറെ രൂപ മുതല്‍ മുടക്കില്‍ മഹാഭാരതം സിനിമയാക്കാനാണ് ആഗ്രഹിച്ചത്. ഇതു സംബന്ധിച്ച പ്രാഥമിക ചര്‍ച്ചകളെല്ലാം പൂര്‍ത്തിയായിക്കഴിഞ്ഞു. സംവിധായകന്‍ ശ്രീകുമാര്‍ മേനോന്‍ ഇതുമായി മുന്നോട്ട് പോകുന്നുണ്ട്. മലയാളവും ഹിന്ദിയും ഉള്‍പ്പെടെ പല ഭാഷകളിലായി സിനിമ നിര്‍മ്മിക്കാനാണ് തീരുമാനം. ഇക്കാര്യത്തിലൊന്നും ഇപ്പോഴും മാറ്റമില്ല. തിരക്കഥയുടെ കാര്യത്തില്‍ എനിക്ക് പ്രത്യേകിച്ച് നിര്‍ബന്ധമൊന്നുമില്ല. ഇതുസംബന്ധിച്ച് ഇപ്പോള്‍ എം.ടി നടത്തിയ പ്രസ്താവനയും എനിക്ക് അറിയില്ല. ഞാന്‍ ഒരു സിനിമാക്കാരനല്ല. സിനിമാ രംഗത്തെ പൊളിറ്റിക്‌സിനെ കുറിച്ചും എനിക്ക് യാതൊന്നും അറിയില്ല. മഹാഭാരതത്തിന് വേണ്ടി പണം മുടക്കാന്‍ തയ്യാറായ ഒരു ഇന്ത്യക്കാരന്‍ മാത്രമാണ് ഞാന്‍. സിനിമ നിര്‍മ്മാണം എന്റെ ജോലിയല്ല. എന്നാല്‍ മഹാഭാരതം എന്ന മഹത്തായ കൃതിയെ സിനിമയിലൂടെ വരും തലമുറക്ക് വേണ്ടി ചരിത്രമാക്കി ബാക്കിവെക്കണം എന്നതാണ് എന്റെ സ്വപ്നം. അത് യാഥാര്‍ത്ഥ്യമാക്കുക തന്നെ ചെയ്യും. 

മഹാഭാരതം എന്ന സിനിമയല്ലാതെ രണ്ടാമതൊരു സിനിമ നിര്‍മ്മിക്കുകയുമില്ല. ഒരു യഥാര്‍ത്ഥ ഇന്ത്യക്കാരനാണ് ഞാന്‍. ആ ചിന്ത മാത്രമാണ് സിനിമക്ക് പിന്നിലുള്ള പ്രചോദനമെന്നും അദ്ദേഹം വ്യക്തമാക്കി. 

Abu dhabi, Gulf, news, ഗൾഫ്, Dr. B.R Shetty, Dr. B.R Shetty on Mahabharatha movie controversy.